何嘉麗：為食路上《福岡食燒肉》

Umai Newshouse 1076 Views UMAI達人組, 何嘉麗, 啤酒, 旅遊, 為食路上, 燒肉, 福岡

何嘉麗，為食！是DJ，是歌手，是作家，是打工仔，是老闆，是訓練員。

UMAI達人組何嘉麗

為食路上

【福岡食燒肉】

何嘉麗

何嘉麗，為食！

是DJ，是歌手，

是作家，是打工仔，

是老闆，是訓練員。

福岡，很多年未去過了，所以在出發前，先上網搜尋一下有甚麼好介紹。都說多牛燒肉平、靚、正，而且客人以本地人為主。坦白說，少年時比較膚淺，當時皮膚上又真的沒有甚麼班痕縐紋，以為貴嘢至好，如今滿面滄桑，就知道性價比的重要。

我去食燒肉

在抵達的第一個晚上，我就去食燒肉，重諗住早尐會人少尐，點知會由天光食到天黑呢！離遠已經見到有好多人企喺門口。急急腳行入去登記，發覺我都要等成十幾張枱至到，而放眼開去，呢間鋪頭嘅枱亦都唔算多，咁我去問個女待應睇下大概要等幾耐，佢竟然話唔知！咁真係唯有等喇！一等就等咗90分鐘，冇錯，係個半小時。

入到去，好煙呀，除咗燒烤所產生嘅煙同味道之外，仲有吸煙嘅煙味，冇錯呀，呢度係准食煙嘅，不過好彩我坐果個位唔係食風位，如果唔係，我會好似我對面枱果個女仔咁，坐正喺抽氣前面，於是燒烤嘅煙同抽煙嘅煙都去哂佢果度，我見佢就真係幾慘喇，不過日本女仔就係有呢個能耐，咁嘅環境都仲係笑笑口！俾著港女，走咗喇！

枱面一早已放上燒紅咗嘅炭爐、一個黑色垃圾袋同埋一本中文餐牌，其實佢嘅選擇唔算多。佢地有一款牛肉，叫做上雪花肉，一人只可以點一份。嘩，咁矜貴，乜咁巴弊，咁就梗係一人叫一碟先喇，另外又分別叫咗一份上里脊肉同紅里脊，咁至可以比較一下佢嘅上雪花肉有幾咁犀利威！當然我亦都會叫一份牛舌，這是賣飛佛！見佢係咁燒，實好熱氣，於是我又叫咗一份蔬菜，不過燒烤過嘅蔬菜，我諗都應該會好熱氣！不過唔駛驚，飲多幾杯番鬼佬涼茶咪得囉！

一段插曲分享：別再說甚麼國度的人什麼出醜，香港人也有令人不安的時候。

因為尐食物係生嘅，所以點完菜，轉個頭已經上枱。果份限住一人一份嘅上雪花牛好似幾好樣喎，略厚切，搵塊嚟燒下先。燒呢尐牛唔可以懶，一定要時不時將佢反轉再反轉，唔係燒老咗就冇人可憐，而佢咁樣限住叫，亦都唔好諗住燒壞咗叫過碟，錢唔係萬能，有尐嘢真係冇得翻轉頭㗎！

講下講下，第一塊已經燒好。唔，果然係入口融化，而以￥690呢個價錢計，雖然只得五塊，但係都真係物超所值！其實佢嘅上里脊肉都唔係差，而且價錢只係比上五花肉平￥10，但係佢可以冇限制咁食，就顯得冇咁矜貴囉，燒第一塊時確實有尐失望，但係我即時改變燒法，只用爐邊火嚟呢個部位嘅肉，嗱，咁就燒出嫩滑而juicy嘅燒肉嘞，佢確實冇上雪花牛咁肥美，但係只要俾心機燒，都可以好好味！

跟住梗係要試賣飛佛，阿牛舌喇，又係要比心機慢慢燒，雖然我比較鍾意厚切，但係我用心燒烤，喺佢剛剛熟就離火，效果一樣咁好，爽軟適中，￥890都係抵嘅。